من فضلك اترك تعليقك لأعرف أنك مررت من هنا

الأربعاء ٢٠١٩/٦/١٢

كان نفسي

كان نفسي أعمل كل حاجة حلوة أبقى عالم في الطب و ابقى لاعيب كورة حريف و ابقى مدرب كورة بيفهم و كان نفسي أمثل دور الناس كلها تحسه و كان نفسي أعزف مزيكا حلوة

فراغ

لكن انت معقول معرفتش بنات خالص طول فترة الكلية؟!
لأ .. أو يعني .. مرة واحدة
عرفتها ازاي؟؟
مفيش .. دي واحدة زميلتي أصغر مني بسنتين و قي الفترة دي كنت بعاني -و ما زلت- تقدر تقول من فراغ عاطفي كنت بحس ان غريبة ان يكون عندي 22 سنة و معرفتش أي بنت في حياتي فكنت عايز ألاقي واحدة تملى الفراغ ده و حسيت من كلام البنت دي انها تقريبا بتحس باللي بحس بيه.
و بعدين؟؟
كنا قاعدين نتكلم مرة و جت سيرة الموضوع ده و قلتلها يعني لو طلبت منك نخرج سوا نتمشى شوية توافقي؟؟ لقتها سكتت مكنتش متوقعة السؤال قالتلي انت فاكرني بنت مش كويسة؟؟ قلتلها لأ طبعاً بس احنا الاتنين محتاجين لبعض قالتلي ازاي يعني؟ قلتلها يعني كل واحد فينا محتاج يحس انه ملا الفراغ اللي عنده ايه رأيك؟؟ اترددت شوية قلتلها نجرب هنخسر ايه؟؟
و عملتوا ايه؟
خرجنا رحنا وسط البلد ف أغلب المرات و معملناش أكتر من الكلام في كل حاجة..  ايس كريم من عند العبد .. فيلم أجنبي في سينما مترو مع كيس فشار ناكل منه احنا الاتنين.
و محصلش حاجة كده ولا كده؟؟
أول مرتين لأ بس بعد كده بقى فيه مسكة إيد أو بوسة مسروقة في ضلمة السينما.
و كنت بتحس بإيه؟
إني عايز أعيط.


                                                            الخميس
                                                          23-6-2011

أحداث العباسية 28 ابريل-3 مايو 2012

السبت 28 ابريل 2012

كنت قد علمت مساء يوم الجمعة ان اولاد أبو اسماعيل وصلوا لميدان العباسية و اقامواالخيام هناك استعداداً للاعتصام

صباح السبت ذهبت للكلية و وجدت ان الناس قد اقاموا الخيام بشارع الخليفة المأمون أمام جامعة عين شمس و كان منهم من يجلس بالخيام و منهم من يفترش الأسفلت أو الرصيف و منهم جماعة يقفون في تجمهر بالقرب من بوابة كلية التجارة وهناك كان أفراد الجيش قد أغلقوا الطريق.

طبعا لا داعي لذكر انه كان بالشارع قوات أمن مركزي و قوات جيش من التي ترتدي اللبس المموه

هكذا كان الوضع خلال يوم السبت

الأحد 29 ابريل 2012

كنت عند البوابة الرئيسية للمدينة الجامعية حوالي الساعة الثانية عشر ظهراً عندما سمعنا هتافات ذهبنا لنرى فوجدنا ان الجيش قد تراجع من مكانه و أقام المتاريس و الأسلاك الشائكة عند نهاية رصيف مستشفى عين شمس التخصصي تقريباً حيث حدثت أحداث الجمعة التالية و طبعاً امتد التجمهر و امتدت الخيام الى هناك

بعد صلاة العشاء بقليل سمعنا هيصة و دوشة من داخل المدينة و وجدنا الطلبة تجري ناحية البوابة الرئيسية ذهبنا لنرى العدد قد زاد كثيراً بعد ما كان لا يتجاوز المئتين يوم السبت و الأحد

و رأينا راية ترفرف عليها أعلام مصر و ألتراس الأهلي و الزمالك و كنت قد سمعت ان أفراد 6 ابريل قد انضموا أيضاً للاعتصام      المنظر كان تجمهر عند الأسلاك الشائكة التي أقامها الجيش و هتافات و لا شيء غير ذلك بعده بحوالي ساعة بدأنا نسمع أصوات فرقعة و دوشة  من الخارج و المعتصمين يجرون هنا و هناك حوالي ربع ساعة ثم هدأ الأمر

بعدها بساعة أخرى ضوضاء أكثر و أكبر و أصوات الفرقعة المكتومة تتزايد و الناس يجرون بطول شارعي الخليفة المأمون و الزعفران الواقع بين المدينة الجامعية و الجامعة استمر هذا الوضع لمدة نصف الساعة تقريباً

الاثنين 30 ابريل 2012

بعدها ساد الهدوء أمام المدينة حتى الصباح و ذهبنا للامتحان حوالي الساعة الثامنة و الربع تقريبا و مشينا بطول شارع الخليفة المأمون حيث المنظر المعتاد من يوم السبت بالتجمهر و الخيام و الناس المفترشة للشارع بالاضافة ان المعتصمين انتزعو السور الحديد الفاصل بين حارتي الطريق و اغلقوا الشارع عند تقاطع شارعي الخليفة المأمون و الزعفران و عند نفق العباسية

مشينا وسط هذا حتى اقتربنا من موقف السيارات الملاصق لجامع النور بميدان العباسية حيث وجدنا مجموعة من الناس عند مدخل الموقف و بعضهم يجري ناحيتنا و وجدنا الطوب يلقى من داخل الموقف على الناس خارجه و  عرفنا بعدها بقليل ان الامتحان تم الغاؤه

و من ثم رجعنا للمدينة

نزلت الشارع بعد صلاة المغرب حوالي الساعة السادسة و النصف و كان المشهد لم يختلف عن الصباح من جموع الناس الموجودة بشارع الخليفة المأمون و غلق مداخل و مخارج الشارع

رجعت حوالي الثانية عشرة و النصف مساءً و الوضع كما هو عليه و عرفت من أحد زملائي كان قادماً من ناحية ميدان العباسية أنه تم تفتيش حقيبته من قبل المعتصمين الذين يتناوبون على حراسة الشارع عند المتاريس التي أقاموها

الثلاثاء 1-5-2012

الوضع كما هو عليه لم يزد غير

1-تزايد الأعداد

2- خناقة بين المعتصمين و أهالي منشية الصدر المتسلحين بالسيوف و السكاكين بشارع الزعفران  حوالي الساعة الثالثة و الربع عصراً و الحمد لله كانت مجرد تهديدات بين الطرفين لم تتطور ولم تحدث اصابات

3-اغلاق المعتصمين لنفق الزعفران بعد الخناقة و كنت بالخارج هذا اليوم و اثناء الرجوع تم السؤال على هويتي مرتين عند نفق الزعفران و عند بداية رصيف المدينة عند شارع الخليفة المأمون    

4-حوالي الساعة الثانية صباحاً سمعت اصوات اطلاق رصاص و فرقعة قادمة من بعيد أدركت انها من ميدان العباسية

الأربعاء 3 مايو 2012

عرفت صباحا بالأحداث التي وقعت فجر اليوم بالميدان و التي اسفرت عن مقتل حوالي سبعة أشخاص من بينهم زميلنا بالفرقة الثالثة أبو الحسن ابراهيم (نحتسبه عند الله شهيداً) و كان قد قتل أثناء خروجه من جامع النور بعد صلاة الفجر

لم أخرج هذا اليوم لكن كل ما عرفته ان الاشتباكات ع أشدها بميدان العباسية طوال اليوم

الخميس 3 مايو 2012

سافرت عائداً الى بورسعيد و اثناء العودة مر الأتوبيس بالميدان و كان خاليا من أي شخص أو حتى سيارة كان خالياً تماماً لم يوجد هناك الا عربات الأمن المركزي بداخل موقف السيارات    

زهقان

عايز أنزل أتمشى شوية في وسط البلد و أروح كوبري قصر النيل بس مش هعرف عشان مليونية الاخوان لاسقاط الحكومة اللي في ميدان التحرير و أنا أصلا مبحبش الزحمة المبالغ فيها.هذه من المرات القليلة اللي احس فيها اني كاره المليونية اللي في التحرير .
عشان كده أنا مكتفي لحد دلوقتي بالجلوس أمام شاشة اللاب توب لقراءة أي شيء يحسن من حالتي النفسية -اللي زي الزفت من امبارح- و اخترت أقرأ كتاب جر ناعم لعمر طاهر بالاضافة لسماع الست .
كل ما اسمع أم كلثوم  أتأكد ان اللي كانوا عملوا المزيكا الأيام دي كانوا عباقرة بجد حاجة فعلا في قمة الابداع مش عارف هل اللي خلى نوع المزيكا دي يختفي و يظهر الأشكال اللي عارفنها دلوقتي هو تأثر المؤلفين بالمزيكا الغربية ولا ضعفهم ولا يمكن دماغهم مش متكلفة زي الناس بتاعة زمان مع ان الكيف بقى من أساسيات الأيام دي .
عجبني كام جملة كده ف الجزء اللي قريته ف ( جر ناعم ) اسمحولي اشركم معايا فيها
يتورط  الانسان في كثيرين و يتورط فيه كثيرون لتبدأ متاهة تحتاج خريطة أو لمعجزة للخروج منها. الحب كائن أبدي لا يموت لكنه قد يأخذ أشكالا تتغير بمرور الوقت و الدليل انه أبدي أنه يوم القيامة (يحشر المرء مع من أحب)

الحياة لغز ولا أحد على قيد الحياة يعرف الحل هناك أشخاص يحرصون على جمع الدرجات بقوة هؤلاء سيكافئهم الله بدخول الجنة و هناك من  كانوا حريصيين على أن يكونوا (بني ادميين) بكل ما في هذه المهمة من عذاب و مشقة و حيرة هكذا كان حمايا واحد من الذين استسلموا للمهمة التي خلقوا من أجلها و هؤلاء سيكافئهم الله في النهاية بمعرفة حل اللغز.


لم يكن بحاجة للجنس قدر حاجته ببشعور بالامتلاء ابتعد عنها لأنه يعرف أن الجنس سيزيده فراغاً

ملحوظة:مليونية الاخوان اتلغت بدون سبب واضح
                                                                         الجمعة 

                                                                     30-3-2012

ثلاثة أصدقاء

1-عبدالرحمن(عبودي):صحيح انا معرفش عبد الرحمن الا السنة اللي فاتت بس الحقيقة انه من الشخصيات اللي لما تقرب منها لا تملك الا انت تحبها و تحس انك تعرفها من فترة كبيرة و بالتالي تقدرتتكلم معاه في كل اللي في قلبك أي نعم هو بيصدعنا و يلخبطنا بكمية الجمعيات أو بالأصح الاختصارات اللي بيشتغل فيها بس نقول ايه صاحبنا بقى.برضه من الحاجات الكويسةانه من الشخصيات اللي مبشوفهاش كتير عشان كده لما بشوفه باتبسط جدا.

2-محمود داوود(ديفيد):بيشترك مع عبودي في انه ما بيظهرش كتيرمع انه معايا في السكشن و قبلي بمفيش اربع خمس انفاربس دي حاجة يسأل هو فيها ده بقى انه برضه من الناس اللي تحب تتكلم معاها و يمكن اللي سهل الموضوع ده وجود صديق مشترك بينا اللي هو الغائب الحاضر دايما (محمود فاروق) أزود كمان بقى انه من الناس- اللي فعلا و بدون مبالغة- دماغهم نضيفة واللي انا بحبهم جدا (يمكن -احم- لقدراتي المحدودة)

3-تامر صالح(أبو تامر):أبو تامر ده بقى حدوتة كبيرة قوي و صديق كفاح و عشرة عمر رغم اني اعرفه من سنة تانية بس لكن انا بحسب عمري من ساعة ما دخلت الكلية.المهم أبو تامر ده بقى حبي ليه؟ عشان با ختصار كده عشنا مع بعض أوقات صعبة و مرينا بتجارب كتيرة سوا و بعدين كفاية انه من الناس القليلين اللي انا بسيب سري معاهم.بصراحة علاقتي بتامر ميوصفهاش كلام كفايه اقوله بس بحبك يا ابو تامر.

أنانية

أنانية 

حبك أنانية

تسألين بدهشة 

كيف و لماذا؟؟!

لأنك حبيبتي

تمنحيني ما أريد

سعادة و شقاء.. أمل  وخوف

تمنحيني ما أريد 

بأن أكون

انسانا